Sala Gurugu
presenta
a Caxoto
en
"O berce das verbas
(contos para bebés)"
sabado 21 de Maio ás 18,30
Domingo 22 de Mayo ás 12,30
Neste espectáculo Caxoto Contacontos fai acopio dos
seus mellores recursos habituais para estruturar unha sesión
na que se compaxina a imaxe, a voz, a música en directo, a
fantasía, ... Un espectáculo no que a partires da palabra se
inundarán os nosos sentidos de sensacións, imaxes e emocións.
Arredor dos cantos de berce iremos abordando historias
e xogos nos que participar tanto o público infantil como os seus
proxenitores. Historias de ratiños que se acubillan no colo da
lúa, longas xuntanzas onde se decide quen será o rei (ou raíña)
dos animais, a primeira vez que unha nena ve o mar e sinte as
areas escorregar entre os seus dediños miúdos.
Un paseo polos momentos previos ó sono e ós soños que rematará nun tenro canto
de berce colectivo ó son do bambeo das olas do mar.
QUE ATOPAREMOS NESTE ESPETÁCULO:
Nesta proposta acudimos á musica como ferramenta para crear e recrear un espazo
suxerinte no que presentar tres pequenas historias que serán a delicia de meniñas e
meniños. Dentro desta viaxe daremos un pequeno paseo espacial pola lúa, acudiremos a
unha xuntanza de animais onde o lobo debate coas ovellas e os raposos razoan coas
galiñas. Remataremos a viaxe nunha incursión á praia onde a través da música e das
palabras sentiremos a brisa mariña, o tacto da area baixo os nosos pés e os sons dos
barcos atados nun peirao.
Para esta viaxe contaremos cun bo número de instrumentos musicais que serán
tocados en directo: a frauta doce, as maracas, o birimbao, a frauta de nariz, as claves,
o triángulo, o güiro, ...
Para rematar gravaremos en directo unha doce melodía que acompañará a un canto
de berce colectivo co que nais, pais, meniños e meniñas despedirán este espectáculo.
Caxoto Contacontos é unha caste de viaxeiro a medio camiño entre un avó
despistado e un neno abraiado. Tras moitos kilometros camiñando, escoitando e
observando acumula unha reserva de lugares, imaxes, sons e personaxes que bulen pola
súa cabeza á busca de alguén que teña as mesmas gañas
de abraiarse que el.
A súa voz sonora e profunda recolle moitas outras
voces que a imaxinación e a fantasía saben reter: a voz
da ledicia, a voz da aventura, a voz do temible, a voz da
experiencia, a voz da broma, a voz do lonxano, a voz do
misterio, ....
Pero Caxoto Contacontos non só é voz senón que
tamén é imaxe, e música, e movemento, .................e
horas que pasan voando.
